РОУИС-ийн Төгсөлтийн баяр ёслол төгөлдөр боллоо

Рояаль Олон Улсын Их Сургуулийн 2021-2022 оны хичээлийн жилийн “Төгсөлтийн баяр” ёслол төгөлдөр зохиогдлоо. Нийт эрдэмтэн багш нар, магистрын, бакалаврын төгсөгчиддөө халуун баяр хүргэе. 2022 онд РОУИС-ийг 140 оюутан төгсөж эрдмийн зэргээ авлаа. Магистрын 30, Бакалаврын 110 оюутан,  энгэрийн тэмдэг дипломаа гардаж авлаа.

Рояаль Олон улсын их сургуулийн Ерөнхий захирал, Докторант Чулууны Сэлэнгийн Эрдмийн баярт хэлсэн үг

 2022.05.30

Эрхэм хүндэт Рояаль Олон Улсын Их Сургуулийн эрдмийн зөвлөлийн дарга, эрдмийн зөвлөлийн гишүүд хүндэт Ректор, Проректор, Доктор Профессор эрдэмтэн багш нар, төгсөгчиддөө болон энд  хүрэлцэн ирсэн хүндэт зочдод энэ сайхан өдрийн мэндийг хүргэхийн ялдамд Эрдмийн  баярын мэндийг дэвшүүлье.

         Өнөөдрийн энэ баярт өдөр  Рояаль Олон Улсын Их сургуулийн 140   төгсөгч 4  мэргэжлээр амжилттай суралцсаны эрдмийн баяраа тэмдэглэж ,     энгэрийн тэмдэг, дипломоо гардан авахаар сэтгэл догдлон зогсоцгоож байна.

4 жил суралцахдаа та бүхэн энэ л сургуулиасаа найз нөхдөө олж, хичээл сургуульдаа шамдаж, илтгэл хэлэлцүүлж, мэтгэлцэж, авъяас чадвараа хөгжүүлж, уралдаан тэмцээнд өөрийгөө сорьж, бүхий л талаар хөгжиж ирсэн гэдэгт багш нь эргэлзэхгүй байна. Энэ бүхнийг Рояаль олон улсын их сургуулийн эрдэмтэн багш нар нь олгосон юм шүү.

Өчигдөрхөн юм шиг санагдах Тангарагийн баяр дээр сургуулиараа бахархах, өөрсдийн суралцах хэв маяг, хүсэл мөрөөдлөө тэлж бусдаас өөрөөр суралцахын гайхамшигт тэмүүлж байсан тодхон санагдаж байна. Рояалийн гэр бүл, Рояальчуудын онцлог бол Дэлхийн жишигт нийцсэн хөтөлбөр, агуулгын хүрээнд эн тэнцүү амжилтыг үзүүлж дагуулж хөгжих уриатай байдаг билээ.

Рояаль Олон Улсын их Сургууль өнгөрсөн 4 жилийн хугацаанд Их Британийн магадлан итгэмжлэх үндэсний зөвлөлөөр хоёр дахь удаа хошой магадлан итгэмжлүүлж, Монгол Улсын үндэсний магадлан итгэмжлэх зөвлөлөөр магадлан итгэмжлэгдэж, Рояаль Олон Улсын Их Сургуулийн хөтөлбөрүүд Олон улсад төдийгүй Үндэсний хэмжээнд үнэ цэн нь өсөн нэмэгдсээр байна. 

2020 онд  Их Сургуулийн статустай болж  сургалтынхаа цар хүрээг улам тэлж  2022 онд Эрхзүйн хөтөлбөртэй боллоо. Рояаль Олон Улсын Их Сургуулийн Эрхзүйн хөтөлбөр олон улсад ажиллах боловсон хүчнийг бэлтгэх зорилготойгоор  Мэргэжлийн англи хэлтэй чадварлаг, эрхзүйч, хуульчдыг төрөн гаргахаар зорьж байна. 

Рояаль ХБНГУ-ын Асеений магадлан итгэмжлэлтэй Олон улсын Сургууль төдийгүй Монгол Улсын хэмжээнд анхны ОУ-ын Сайн дурын Volunteer  программтай Их Сургууль боллоо. Рояалийн Оюутан бүр нийгмийн болоод Дэлхийн иргэн гэсэн том алсын харааг зорилгоо болгож Олон Улсын тавцанд суралцах, ажиллах боломжийг Volunteer программ нээн олгох юм.

Өнөөдөр Рояаль Олон Улсын Их Сургууль Дэлхийн 20 гаруй орны 30 гаруй шилдэг их сургуулиудтай хөтөлбөрийн артикулэшн хийж 2+2 хөтөлбөр, оюутан солилцоо, хос дипломтай төгсөх боломжоор хангагдаж боловсролын хөтөлбөрийн чанарын баталгаажуулалтыг хангасан сургалтын байгууллага болж өсөж хөгжжээ. Сургалтын агуулга хөтөлбөрийн цөм хэсэг болох оюутны хөгжил, цогц боловсролыг эрхэмлэж оюутнаа хөгжүүлэх хөтөлбөрийг шинэчлэн боловсруулж үйл ажиллагаагаа явуулж байна. 

Энэ өдөр Бид бүхний бахархал болж, сургуулийнхаа нэр хүндийг өндөрт өргөсөн  Эрдэм шинжилгээний хурлын шилдэг илтгэгчид,  олимпиадын аварга багийн гишүүд,  бүжгийн Улсын аварга,  хөлбөмбөгийн волейболын, сагсанбөмбөгийн аварга багийн тамирчид, урлагийн наадмын шилдгүүд, олон улсын хурлын шилдэг илтгэгчид, мэтгэлцэгчид  та бүхний дунд зогсож байна.  Та нар минь бид бүхний бахархал юм шүү. Royal Student council, Royal Gulls Royal Beats Royal Wolves Royal Swallows Royal Book lovers Royal Arch Royal Diplomat  клубуудын шилдэг төгсөгчид болон үеийн үед анги хамт олноо амжилттай удирдаж, эвсэг хамт олныг бүрдүүлж чадсан бүлгийн дарга нартаа баярлалаа. Анги удирдсан чиглүүлэгч, манлайлагч багш нартаа баярлалаа 

Та бүхэн төрөлх сургуультайгаа үргэлж холбоотой байж, сурсан мэдсэн зүйлээ эх орныхоо хөгжил дэвшилд зориулж, сайн мэргэжилтнүүд болж, сургуулийнхаа нэрийг өндөрт өргөж явахыг хүсэн ерөөе.

We Are Royals   

Рояаль Олон улсын их сургуулийн Ерөнхий захирал Ч.Сэлэнгэ